الحرب البيولوجية وتطورها منذ عهد الرومان

الحرب البيويوجية

الرومان أول ناس عملت سلاح بيولوجى

ايوة وكان السلاح بتاعهم(جيف الحيوانات الميته) لوثوا بيها مية الشرب بتاعه العدو ,,,

والتتار كانوا بيرموا جثث مصابة بالطاعون بالمنجنيق على أعدائهم 

وده ابسط تعريف للسلاح البيولوجى

ومعنى سلاح بيولوجى ,,هو استخدام كائنات دقيقة ,ميكروبات,عندها قدرات فتاكه والهدف منها إما الإبادة بالقتل أو التسبب فى امراض معقده ,, ومش لازما تكون موجهه للإنسان بس ,,لان فيه اسلحه بيولوجية بيبقى الهدف منها القضاء على الثروة الحيوانية مثلا او أصناف معينه من المحاصيل الزراعيه للبلد المعادية.

المفزع ف الاسلحه البيولوجية مش بس قدرتها على الفتك رغم انها مهولة ,, لكن قدرتها على التكاثر لان خليه واحده متتشافش ممكن ف خلال ساعات تتحول لبلايين الخلايا ف بيئة مناسبة زى اللى بيوفرها جسم الضحية ,,وبيبقى كل مصاب قنبلة بيولوجية متحركة,,

والشئ المرعب هو ان الهجوم بالاسلحه البيولوجية مش محتاج تجهيزات معقدة ولا اى شئ الامر غاية ف البساطة بس كفايه توصله للمية او الأكل او فلاتر السجاير او المكيف ف بناية مليانة سكان ,,والموضوع ده يخلى أعتى الدول متقدرش ترد هجوم مباغت من النوعية دى ,, وأصلا انتاج السلاح البيولوجى مش معقد زى مثلا صناعه الاسلحه لان المعلومات متوافرة للجميع وعلى الانترنت والطلبة ممكن ينفذوا تجارب مبدئية ف المراحل الجامعيه ده غير انها غير مكلفه فممكن لأى مجموعه من الهواة انهم يملكوا سلاح بيولوجى يهددوا بيه أعتى الحكومات بمبلغ أقل من 50 ألف دولار عشان كدا بيسموها قنبلة الفقراء الذرية 

وفيه تقسيم للكائنات الدقيقة المستخدمه لأغراض التسليح البيولوجى بيصنفها تلت أقسام :

الأول ,, البكتيريا وأشهرها الـ

 "Bacillus anthracis"

 المسببة لمرض الجمرة الخبيثة أو مايسمى بالأنثراكس، والـ

 "Yersinia pestis" 

المسببة للطاعون، والـ

 "Vibrio cholera"

 المسببة للكوليرا.

التانى الفيروسات وأشهرها فيروس الإبولا
 - Ebola -

 الفتاك وده بيسبب النزف الشديد من اماكن مختلفة وغالباً بتنتهى بالوفاة. وفيروس الهنتا

 - Hanta Virus –

 وده بيسبب اضطرابات في الجهاز التنفسي، وفيروس الـ 

"Venezuelan Equine Encephalitis

 واختصاره

 "VEE" 

وده بيسبب ضرر شديد للجهاز العصبي ممكن يوصل للوفاه .

التالت الريكتسيات

 Rickettsias 

,ودى بتعيش داخل الخليه بشكل طفيلى وبتنتقل عن طريق الحشرات ، وأشهرها الـ 

"Rickettsia prowazekii" 

المسببة لحمى التيفوس ,واللى اتسببت بانتشارها خلال الحرب العالمية الأولى بشكل غامض فى وفاة ثلاثة مليون شخص في شرق أوروبا، والـ

 "Coxiella burnetii"

 ودى بتتمتع بسرعه ف الانتقال وتسبب حمى وخلل في أنسجة عضلات القلب، وعلى الرغم من عدم خطورتها البالغة على الحياة إلا أن بإمكانها شل جيش كامل.

واللى بيزود فى خطورة الأصناف دى هو إمكانية إضافة صفات وراثية جديدة لها عن طريق الهندسة الوراثية بحيث تبقى اكثر فتكاً أو أكثر مقاومةً للمضادات الحيوية.

أما بخصوص المواد السامة المستخلصة من الميكروبات فأشهرها وأكثرها فتكاً على الإطلاق هو سُم البوتولينم وده بيقدر الخبراء بأن بضع جرامات منه قادرة على إبادة مدينة كاملة إذا ما تم نشره بشكل جيد