حد يعرف ايه فاايده الحاجه الموجوده على شنطه العربيه
هل هى للزينه فقط ولا ليها دور تانى
هى منظرها جميل , بس اكيد ليها فايده
الجناح او ال
(spoiler)
منتشر اووى على عربيات السباق
بص يا سيدى اصل كلمه
spoiler
جايه من كلمه
spoil
يعنى يبوظ ,ودى وظيفت الاسبويلر ومعناه انه بيغير طريقة مرور الهوا على العربية علشان عامة يديها ثبات أكبر,
فكرة العمل
طبعا كلنا عارفين ان الهوا زاى المايه بالظبط ,, وسط بيقاوم حركه الاجسام خلاله
تقدر تلاحظ دى لما تخرج ايدك من شباك العربيه وهى ماشيه ,, هتلاقى الهوا بيزق ايدك لورا وبيقاوم سرعه تحركها ال هى سرعه العربيه
والاسبويلر ده عامة ليه هدفين
1-
بيزود ثبات العربية
عشان شكله المنحنى بيخلى الهوا يمر من فوقه ويضغط عليه, وبالتالى يضغط على العربيه , فبتقرب من الأرض وثباتها يزيد نتيجة للضغط اللى السبويلر عامله
2-
فى العربيات الدفع الخلفى الاسبويلر لما بيضغط على العربية بيضغط عليها من الخلف ,, وبما أن العربية دفع خلفى ,, فده بيزود التصاق الأطارات الخلفية بالأرض وبالتالى بيحسن من سرعة العربية القصوى وأستجابتها للضغط على البنزين
بس فى مشكلتين
المشكله الاولى
الاسبويلر مينفعش لعربيات الدفع الامامى ,, لانه زاى ما قولنا انه بيضغط على العجل الخلفى ,, وده بيخلى العجل الأمامى يرتفع عن الأرض شوية وبالتالى بيقلل من سرعة العربية
تانى مشكله
الأسبويلر مبيؤديش وظيفته غير على السرعات العالية, يعنى مش هتجيب أسبويلر وتبقى ماشى على 60 وتقول ثبات العربية أتحسن ,,, محاسن الأسبويلر بتظهر عند وفوق 80 لأن مقاومة الهواء لسرعة العربية ساعتها بتكون كافية لأن الأسبويلر يضغط على العربية
عندنا فى مصر
بيعملوا الاسبويلر بزاويه 90 على العربيه
مش واااخدين بالهم ان ده بيخليه يبقى زاى فرامل هو
ونفس الحكايه لو كان زاويه ميله قليله اووى بيأثر تاثير بسيط زاى الاسبويلر بتاع ال128 كده
ويعتبر بيبقى منظر بس
الجديد بقى
ان الاسبويلر ده نوعين ,, خلفى وامامى
الامامى ده اللى هو الشفه ال معظم الناس بتكربها عند السمكرى للشكل بس
دى بتعمل مع العجل الأمامى زى الأسبويلر الخلفى بالظبط
منتشره ف عربيات الفورميلا وان
ودى اشكالها
ولزيادة الثبات لأقصى حد ,, الاسبويلرين الاتنين بيتركبوا مع بعض ,, علشان ثبات العربية كلها يزيد مش الضغط يبقى على نص أه ونص لأ , وعلشان العجل يلتصق أكثر بالأرض على السرعات العالية
وأشكال الأسبويلرز كتير, بس كلها بتؤدى نفس الوظيفة مهما الشكل اتغير
0 comments:
Post a Comment