32 بت ولا 64 بت !؟

جهازك الكمبيوتر 32 بت ولا 64 بت !؟

ايش يعني ؟!

يعني النظام ! نظام التشغيل

 (windows 8, windows 7, windows xp)

نظامه 32 بت ولا 64 بت !؟

ايوة يعني ايه بالضبط !!؟

في مقدار معين من حجم الذاكرة المعالج يقدر يوصل له بنفس اللحظة .. بالتالي المعالج اما ممكن يقرأ 32 بت في النقله الوحده .. او 64 بت من البيانات..

وعبارة يقرأ ذي بأسلوب تقني أكثر : يعني مامقدار العناوين الي يقدر المعالج انه يقراها في المره الوحده؟ وطبعاً بطبيعة الحال لما يقدر يقرأ عناوين اكبر سرعته تكون اكبر ..

يعني النظام الي بيدعم 64 بت يكون اسرع من 32 بت ، بس مش بالضرورة بضعف السرعة لوجود اعتبارات أخرى في سرعة المعالج مش بس كم مقدار العناوين الي يقدر يقرأها في النقلة الوحدة ، وهو موضوع منفصل عن موضوعنا ذا

كمان في نقطة كم الحجم الأقصى للذاكرة الي يقدر النظام يقراها لذاكرة الرام !؟

بالنسبة للنظام الي معالجه 32 اقصى حاجه يقراها 4 جيجا .. مينفعش يعني تركب في جهازك 6 جيجا ويقراها ! لكن بالنسبة لنظام 64 يقدر يدعم لغاية 16 إكسابايت والرقم ذا نظرياً طبعاً ماوصلتش احجام الرامات للرقم ذا

طيب هل برامج 64 يدعمها نظام 32 !؟

ايوة يدعم ((اغلبها))

طيب خلاص كلنا نحمل نظام 64 مدامه حلوة كذا !

لا للاسف مينفعش لان نوع المعالج عندك يحكم ، اما يقبل الاثنين او يقبل بس نظام 32 للاسف

وعشان تعرف جهازك يدعم او مايدعمش .. الموضوع بسيط جداً بس اول شي انت نظامك ايش 64 ولا 32؟!

تعال نشوف ... اضغط على أيقونة جهاز الكمبيوتر عندك ، اختار خصائص او

 properties

 عشان الناس الي تعليمهم انجليزي

تطلع لك نافذة فيها معلومات عن جهازك ونظامه .. وبتلاقي حاجه مكتوب عليها نوع النظام

 system type

طيب وعشان تعرف هل اصلا جهازك يدعم تحميل نظام 64 او لا .. نمشي على خطوات اعزاءنا في موقع الدعم من مايكروسوفت كالتالي :

"لمعرفة ما إذا كان الكمبيوتر يقوم بتشغيل الإصدار 32 بت أو الإصدار 64 بت من

 Windows 

في

 Windows 7

 أو

 Windows Vista،

 قم بما يلي:

1. افتح النظام عن طريق النقر فوق الزر ابدأ , ثم النقر بزر الماوس الأيمن فوق الكمبيوتر, ثم النقر بعد ذلك فوق خصائص.

2. أسفل النظام، يمكنك عرض نوع النظام.

إذا كان الكمبيوتر الخاص بك يقم بتشغيل

 Windows XP،

 فقم بما يلي:

1. انقر فوق ابدأ.

2. انقر بزر الماوس الأيمن فوق جهاز الكمبيوتر، ثم انقر فوق خصائص.

o إذا لم يكن "x64 Edition" مدرجاً، فأنت تقوم بتشغيل الإصدار 32 بت من 

Windows XP.

o إذا كان

 "x64 Edition"

 مدرجاً تحت النظام، فأنت تقوم بتشغيل الإصدار 64 بت من

 Windows XP."

ايوة نظامكم ايش طلع ؟ يدعم ولا ما يدعمش !؟

نقطة بس لازم ذكرها من باب الامانه العلمية :

في اشاعه كذا طالعه مش عارفه من مطلعها .. مفادها أنك لو مركب نظام في جهازك 64 بت ، مقدار الرام في جهازك مابيطلعش زي مايطلع لجماعة 32 ! اقصد لما دخلت خصائص الكمبيوتر اكيد شفت انه مثلا حجم ذاكرة الرام عندك 4 جيجا ويقولك المستخدم منها 2.9 او 3.75 يعني على حسب ، مستحيل يقولك الذاكرة 4 والمستخدم برضو 4 جيجا ! سواء كان 32 ولا 64 !

لان ببساطه حجم ذاكرة الرام في جهازك يحجز منها اولا كرت الفيديو في جهازك ، ثم تحجز منها بعض الشرائح او القطع في الماذربورد ، والباقي هو الي انت تستخدمه عشان باقي عملياتك من فتح برامج وخلافه ..

فما تصدقوش حد يقولكم ان نظام 64 بيقرأ حجم الرام كامله ! وهو اساسا النظام ياجماعة يقرأها كامله بس يطلعلك المستخدم عشانك بعد زي ماقلنا القطع الي لها الاولويه تسحب اولاً ، وهي تسحب يعني تسحب سواء 64 او 32 بت !