مفهوم نظام التشغيل وكيف تختار الانسب لك

انت من الـ 91.71% الي بيستخدموا

 Microsoft Windows

ولا من الـ 7.08% الي بيستخدموا الماك

ولا من الـ 1.21% لينكس !!؟

طب في جميع الحالات يعني ايه نظام تشغيل !؟

نظام التشغيل هو البرنامج – ونستعمل كلمة برنامج مجازاً هنا للتبسيط – الاهم من بين كل البرامج على جهازك، هو الوسيط بينك وبين الهاردوير – القطع الصلبة يعني – المكونة لجهازك الكمبيوتر ، والي تخلي الهاردوير ذا الي ميفهمش غير الـ 0 و 1 يفهم اوامرك .

بتفصيل اكبر :

نظام التشغيل هو المسؤول عن استقبال اوامرك من الكيبورد او الماوس مثلا ، ارسالها للمعالج لتتم معالجتها ، استعمال الذاكرة الرئيسية او المؤقتة الـ رام يعني ، وعمل الخزن اللازم للنتائج المطلوبة وعرضها عن طريق اجهزة الاخراج زي الشاشه او السماعه او غيرها من اجهزة الاخراج .

انا قلتلكم ان اجهزة الكمبيوتر او القطع الالكترونية المكونة لاي جهاز كمبيوتر الهاردوير يعني وبالعربي العتاد تنقسم لـ :

1-

 اجهزة ادخال: ماوس ، كيبورد ، مايكروفون ، ماسحه ضوئية ...

2- 

اجهزة اخراج : سماعة ، طابعة ، شاشه ...

3-

 اجهزة خزن : فلاش دسك ، هاردسك ، سي دي ، دي في دي ..

4-

 اجهزة معالجة او وحدة المعالجة بلفظ ادق : وهي الي تتكون من المعالج والذاكرة الرئيسية الرام يعني و وحدة التحكم المركزي ..

طيب ذي الحاجات كلها تتفاهم بينها كيف؟ تتفاهم معك انت كمستخدم كيف؟

كل الشغل ذا على نظام التشغيل !

طيب فائدة البرامج الي نستعملها ايش؟ يعني برامج الرسم والقراءة وبرامج الاوفس مثلا والفوتوشوب ومكافحة الفيروسات وذي كلها ...

ذي طبعاً محتاجه نظام التشغيل برضو عشان تتفاعل مع الهاردوير وتنفذ لك أوامرك !

يعني ممكن بالمختصر كذا نقول اهم حاجه تحملها على جهازك هي نظام التشغيل !

لازم تسأل نفسك هل نظام التشغيل ذا يناسب مواصفات الهاردوير لجهازك ؟

معك ثلاث انظمة تشغيل معروفة عالمياً :

Windows

Macintosh

Linux

كيف اختار أي منهم يناسبني ؟

Windows :

 هو الاشهر عالمياً ، نسبة المستخدمين زي ماقلنا 91.71% من اجمالي مستخدمي الكمبيوتر ! يعني مش انت لوحدك تستعمله ! ممكن اي حد يساعدك لو صادفتك اي مشكلة فيه ... يعني في برامج كثير موجه له ، العاب كثير برضو ، ويعني سعره منخفض نوعاً ما !

طبعاً مافيش شركة معينة محتكره عتاد – هاردوير - ويندوز ، شركات كثير ممكن تشتري منها العتاد وتحمل عليه النظام مش زي مثلا ماكنتوش ! نتكلم على ذا بعد شوية ..

بس مشكلة ويندوز وعتادها ذا الي الكل يصنعه انه مش بنفس جودة ماكنتوش مثلا ! يعني ممكن القطع تتعطل بسرعه ، ممكن تلاقي قطع نوعيتها رديئه جداً وتباع كانها ذات جودة .. وحاجات زي كذا ..

نقطة ثانية مع نظام ويندوز بس اظن كلنا تعايشنا معها : كثرة الفايروسات !

هو الموضوع تناسب طردي ! مستخدمين كثير يعني بيئه خصبه لتعدد نسخ الفيروسات وانواعها ! بس كلنا ممشين الحال باستخدام مكافحات الفايروسات الي مليانه السوق ..

ولابد من الاعتراف ان انظمة الويندوز تؤدي الغرض بكفاءه رغم عدم استقرار عتادها زي ماقلنا مقارنة بعتاد أبل ماكنتوش، وان انظمة الويندوز سهله جداً في الاستخدام مقارنة مثلا بانظمة لينكس..

Macintosh:

 او اختصاراً ماك ، ذي تشتغل بس على العتاد الي تصنعه شركه آبل ! صحيح سعرها مرتفع بس تعتبر جودته افضل مافيش موضوع التقليد وانتشاره زي الاجهزة الي تدعم ويندوز ..

اجهزة ابل بلا منافس ولا منازع تتفوق في مجال الملتيميديا – يعني من ناحيه الصوت والصورة ووضوحها – وهي الخيار الاول لكبار ومحترفي التصميم وحلم كل من يتعلم التصميم عشان سعرها مرتفع

انتشار الفايروسات فيها يكاد يكون معدوم ، عشان المستخدمين يشكلوا فقط 7.08% من اجمالي مستخدمي الكمبيوتر عالمياً..

Linux:

 ذا نظام يسموه مفتوح المصدر !

يعني ايش مصطلح مفتوح المصدر ذا ؟ يعني هو مش تبع شركه معينة ، مش محتكره حقوق استعماله شركه محدده ولا جهة محدده ، يعني هو اساسا لاغراض تعليميه تطويرية ، يعني باختصار شديد هو مجانى!

يشتغل على عتاد ويندوز المجاني ذا ! براحتنا نحمله نعدله نضيف عليه ..

بس ينبغي ذكر نقطتين :

Linux

 هو زي مانقول قلب النظام – مجازاً – وبالانجليزي

 kernel

 يعني انت محتاج سوفت وير اضافي يكون مكمل له او زي مااسمه بالانجليزي

 distributions..

 الموضوع مش معقد انت ممكن تنزله دفعه وحده يعني الاثنين مع بعض زي انظمة

 Ubuntu, Mint ,Fedora

 والاشهر هو الاخير ..

موضوع الفايروسات فيه يعني نص نص ، مش كثير ولا قليل ، بس اللنكس عشان تستعمله يحتاج لك شويه صبر كذا وخبره مع الانظمة لكن بالمقابل مش بالضرورة تكون متخصص او شي من هذا القبيل ..

وزي ماكنتوش عشان انتشاره اقل من الويندوز برامجه والعابه اقل نسبياً من اليم توفره وتدعم انظمة ويندوز ..