الهاكرز - الجزء الثالث

الهاكرز - الجزء الثالث 

بعض الأخطار والممارسات اللي بيمارسها كل الناس .

أول ما بتنزل تطبيق من المتجر أو حتى من برا , بيقولك الصلاحيات اللي البرنامج ده عايزها , إقرأها كويس جداً ومتستسهلش بيها , فيه بعض البرامج مش بتبقى محتاجة الكاميرا , بس بتطلب تصريح الكاميرا , ده لازم تشك فيها , وأنصحك تدور كويس جداً ع النت هل البرنامج ده تمام ولا لا .

أكتر حاجة ممكن توديك ف داهية إنك تشبك على شبكة واي فاي في مقهى مثلاً أو في كافيه , لإن فيه " عيال صغيرة " مش محترفين ولا أي حاجة , يروح ينزلك برنامج بسيط يسرق بيه أكاونت الفيس بتاعك , شفت البساطة ؟ طبعاً ده لو ف حالة إن حضرتك مفعل الإتصال الآمن

 Https

 لكن لو مش مفعلو , بلاااااش تشبك صدقني , أنا دايماً لما بدخل على أي كافيه بشوف فيه حد بيعمل

 sniff 

على الشبكة ولا لا , يعني بيتجسس عليها ولا لا . وبعدين أفتح فيسي والحاجات دى .

ناس كتير بتسالني , هل الواتس اب ممكن حد يخترقو زي ما سمعنا ؟ أقولك اه يا باشا , بس الكلام ده زمان قبل ما يستخدمو تشفير

 https 

في ارسال واستقبال الرسايل , يعني إنتا الرسالة اللي بتبعتها بتروح متشفرة , ومحدش يعرف يفك التشفير بتاعها , زمان بقى قبل ما يستخدمو نظام التشفير ده كانت الرسايل بتروح زي ما هيا , وممكن نفس العيل اللي سرق أكاونت الفيس بتاعك يقرا الرسايل بتاعتك

الكلام ده بيتطبق على جميع أنواع الموبايلات , يعني ممكن بياناتك تسرق من أي موبايل , لكن الهجمات ممكن تعملها باستعمال موبايل أندرويد أو أيفون , لكن الأندرويد أكتر لإنو نظام مفتوح المصدر .

أقولك حاجة حلوة بقى ؟ لو حد عرف يدخل على شبكة الوايرليس اللي إنتا شابك عليها يقدر يجننك لو مقدرش يسرقك , يقدر يخلي كل الصور اللي ع النت تتحول لصورة واحدة هوا مختارها , ممكن يخليلك اليوتيوب كلو برضو يطلعلك فيديو واحد هوا مختاره , وممكن يخليلك كل الصور اللي ع النت متشقلبة , ممكن يكتبلك أي كلمة ع الشاشة عندك . كل ده بموبايل أندرويد

بعض الاسئلة الهامة 

1. ازاى الواحد لما يشبك نت يعرف الشبكة عليها

 sniff ولا لا ؟

السؤال ده جالي كتير , وللأسف البرامج اللي بتستخدم لكشف العملية ده صعبة ومفيش حد مبتدئ يقدر يستعملها , أنا هقولكم على طريقة تضمن بيها أكاونت الفيس , هتدخل على إعدادات الحساب >> الأمان >> تفعيل الاتصال الآمن , بعدين هتبص فوق على شريط البحث هتلاقي مكتوب

 https

 يبقى إنتا كده تمام .
تاني حاجة , استعمل متصفح جوجل كروم , مجرد ما حد يعمل

 sniff

 ع الشبكة هيديك تحذير , وساعتها ممكن تعملو

 net cut

 او تحظر عنوان الماك بتاعو أو تغير الباسوورد .

تاني سؤال أو توضيح :
((((بالنسبة لموضوع الفون هاكنج .. في معلومة بسيطه خاطئة وهوا انه بقى آمن 100% بعد ما شفروا كلامه ..
بس في كي لوجرز بتتبرمج على الكيبورد اللي محطوط على التليفون فبالتالي هيا مش بتدخل في البرنامج اساسا هوا بيعمل الباك بتاعه من الكي بورد نفسه .. كذلك لو تم استخدام screen captures مع كود لذيذ اوي كده عشان ياخد الكلام من الصوره ( زي الفلتر اللي بياخد الكتابة من الصوره في الفوتوشوب ) وده نوع قذر وموجود برضه من الكي لوجرز .. فا لو تم تنزيل اي من انواع الكي لوجرز ده او اختراق التليفون بشكل عام مفيش حاج هاسمها شفرة ساعتها

بس بشكل عام إحنا بنتكلم عن تأمين المستخدم العادي مش المهم , يعني لو إنتا تاجر مخدرات مثلاً يبقى ولا وسيلة من ده هتقدر تأمنك , إذا كان الرؤساء مش عارفين يأمنو موبايلاتهم . لكن أنا واحد عادي ف أضمن إن الحاجات ده متحصلش
إلا لو رحت نزلت تطبيق من ع النت زي الكيبورد مثلاً swift key من غير ما تنزلو من ع الجوجل بلاي ونزلتو من برا , ممكن يكون متعدل فيه بحيث إن اي كلمة تكتبها عليه تروح للهاكر , وأعتقد إنو مش هيستفيد بأسرارك أو بكلامك مع الناس , هوا عايز أرقام فيزا , حسابات بنوك .... إلخ

السؤال التالت , هل كل البرامج على الجوجل بلاي مأمونة ؟
ده العيب الكبير اللي ف الأندرويد , إن أي حد يقدر يحط أي تطبيق من دون مراقبة , قبل ما الـ

 BBM 

ينزل ع الجوجل بلاي , كان فيه حوالي 10 تطبيقات مزورة لسرقة البيانات , ومحدش خد بالو .
عكس الـ

 ios 

اللي بيشترط عليك 300 شرط لازم البرنامج بتاعك يعديهم عشان يتحط ع المتجر
إنما الجوجل بلاي هيصة كل اللي يحط يحط , عشان كده بننصحك تحط أنتي فايرس على الموبايل .

السؤال الرابع : هل ممكن حد يتجسس على مكالماتي الصوتية على الفايبر أو السكايب ؟

برضو هنعيد تاني , بما إنك مستخدم عادي مش راجل مهم أو سياسي , ف إنت ف أمان , لكن أساساً في السكايب قبل ما بتسجل فيه باند بيقولك : لشركة مايكروسوفت الحق في الإطلاع على أي محادثة وتسجيلها وأرشفتها بدون علم . وطبعاً محدش بيقرا الشروط ده ولا حياة لمن تنادي .